Альбер Мары Лебур (фр.: Albert Marie Lebourg; 1 лютага 1849, Манфор-сюр-Рыль, Францыя — 6 студзеня 1928, Руан) — французскі мастак-пейзажыст, паслядоўнік імпрэсіянізму і постімпрэсіянізму, прадстаўнік руанскай школы жывапісу. Кавалер ордэна Ганаровага легіёна.
Лебур нарадзіўся ў французскім мястэчку Манфор-сюр-Рыль. Вучыўся ў майстэрні архітэктара Друэна, а затым у Школе жывапісу і мастацтва ў Руане. У 1867 годзе наведвае парыжскі Салон, дзе знаёміцца з працамі Курбэ і Манэ, якія аказваюць на яго вялікае ўражанне.
У перыяд з 1872 па 1876 год жыве ў Алжыры, працуе выкладчыкам у мясцовым Таварыстве прыгожых мастацтваў. У 1877 годзе Лебур вяртаецца ў Парыж, дзе знаёміцца з многімі імпрэсіяністамі, у тым ліку Дэга, Манэ і Сіслеем. Лебур двойчы, у 1879 і 1880 гадах, выстаўляе свае карціны на выставах імпрэсіяністаў. У перыяд з 1886 па 1895 год жыве ў Парыжы, штогод выстаўляецца ў Салоне. У далейшым вельмі шмат падарожнічае па Еўропе, наведвае Галандыю, Англію і Швейцарыю.
У 1896 годзе ў галерэі Манчыні праходзіць выстава яго работ. У 1900 годзе Лебур прымае ўдзел у Сусветнай выставе. У 1903 годзе ён становіцца кавалерам Ордэна Ганаровага легіёна.
Фактычна яго кар’ера мастака заканчваецца ў 1921 годзе: паралізаваны Лебур больш не малюе. Памёр 7 студзеня 1928 гады ў Руане.