«Прамо́ва караля́»[13] або «Каро́ль гаво́рыць!»[14] (англ.: The King’s Speech) — брытанскі мастацкі фільм 2010 года, зняты рэжысёрам Томам Хуперам паводле сцэнарыя Дэвіда Сайдлера[en][15]. Фільм расказвае пра змаганне брытанскага караля Георга VI з заіканнем.
Прэм’ера фільма адбылася 6 верасня 2010 года на кінафестывалі ў Тэльюрайдзе[16].
Дзеянне карціны разгортваецца ў першай палове XX стагоддзя ў Вялікабрытаніі. У цэнтры сюжэту герцаг Ёркскі Альберт. У яго ёсць усе прадумовы стаць будучым каралём, аднак адзін непрыемны момант усё псуе: кожны раз, як Альберту даводзіцца выступаць на публіцы, міжволі ён пачынае моцна заікацца. Ён ужо звяртаўся да найлепшых спецыялістаў, тым не менш так і не змог пазбыцца дэфекту маўлення. Аднаго разу яго жонка Лізавета прапануе звярнуцца па дапамогу да неартадаксальнага аўстралійскага лагапеда на імя Лаянэл Лог. Той не мае медычнай адукацыі, але яго метады хоць і супярэчлівыя, аднак даюць плён. Пасля колькіх сеансаў лячэння паміж двума вельмі непадобнымі людзьмі ўзнікае сяброўства, а хвароба прынца Альберта пачынае адступаць. 20 студзеня 1936 года яго абвяшчаюць каралём Георгам VI, а Лог і надалей дапамагае манарху змагацца з заіканнем.
Паводле інфармацыі сайта «Internet Movie Database» фільм быў адзначаны 109 кінаўзнагародамі і яшчэ 205 намінацыямі[17].