У Вікіпедыі ёсць артыкулы пра іншых асоб з прозвішчам Бор.
Нільс Хе́нрык Даві́д Бор (дацк.: Niels Henrik David Bohr; 7 кастрычніка 1885 — 18 лістапада 1962) — дацкі фізік, адзін з заснавальнікаў квантавай механікі.
Нільс Бор вядомы як стваральнік першай квантавай тэорыі атама[16] і актыўны ўдзельнік распрацоўкі асноў квантавай механікі. Ён таксама зрабіў значны ўклад у развіццё тэорыі атамнага ядра[17] і ядзернай рэакцыі, працэсаў узаемадзеяння элементарных часціц з асяроддзем[18].
У 1922 годзе Нільс Бор атрымаў Нобелеўскую прэмію па фізіцы за выдатныя дасягненні ў галіне фізікі: вывучэнне структуры атама.
Бацька Нільса Бора, Крысціян Бор, быў прафесарам фізіялогіі. Разам са сваім бацькам і братам Харальдам[ru] Бор рэгулярна вёў дыскусіі на навуковыя тэмы, гэтыя дыскусіі ўзмацнялі ў абодвух братоў інтэрэс да прыродазнаўчых навук, а таксама значна паўплывалі на іх далейшы жыццёвы шлях. Харальд Бор стаў праз некаторы час прафесарам матэматыкі, а Нільс Бор аддаў перавагу вывучэнню фізікі. Яго брат быў акрамя таго вядомым і папулярным дацкім футбалістам і гуляў за нацыянальную зборную Даніі. Нільс Бор таксама гуляў у футбол і быў брамнікам першай дацкай футбольнай лігі.