Васіль II Васілевіч Цёмны (1415 — 1462) — Вялікі князь маскоўскі з 1425, сын Васіля I Дзмітрыевіча.
У княжанне Васіля II адбывалася працяглая феадальная міжусобная вайна. Яго супернікамі выступіла кааліцыя ўдзельных князёў на чале з яго дзядзем — князем Юрыем Дзмітрыевічам і яго сынамі Васілём Касым і Дзмітрыем Шамякай. Падчас войнаў, ускладненых адначасовай барацьбой з Казанню і Вялікім княствам Літоўскім, велікакняжацкі пасад некалькі раз пераходзіў да галіцкіх князёў, якіх падтрымлівалі Ноўгарад і часова Цвер. Васіль II быў аслеплены (1446) Дзмітрыем Шамякам (адгэтуль мянушка «Цёмны»), аднак у канчатковым выніку ён атрымаў у пачатку 50-х гг. XV ст. перамогу. Васіль II ліквідаваў амаль усе дробныя долі ўсярэдзіне Маскоўскага княства, умацаваў велікакняжацкую ўладу. У выніку шэрагу паходаў у 1441—1460 узмацнілася залежнасць ад Масквы Суздальска-Ніжагародскага княства, Наўгародскай зямлі, Пскова і Вяцкой землі. Паводле загада Васіля II мітрапалітам быў абраны рускі епіскап Іёна (1448), што азначала абвяшчэнне незалежнасці рускай царквы ад канстанцінопальскага патрыярха і ўмацоўвала міжнароднае становішча Вялікага княства Маскоўскага.
| Папярэднік: Васіль I |
Вялікі князь маскоўскі 1425 – 1433 |
Пераемнік: Юрый Звенігародскі |
| Папярэднік: Юрый Звенігародскі |
Вялікі князь маскоўскі 1433 – 1434 |
Пераемнік: Юрый Звенігародскі |
| Папярэднік: Васіль Касы |
Вялікі князь маскоўскі 1434 – 1446 |
Пераемнік: Дзмітрый Шамяка |
| Папярэднік: Дзмітрый Шамяка |
Вялікі князь маскоўскі 1448 – 1462 |
Пераемнік: Іван III |