Яўген Іванавіч Кімстач (нар. 5 жніўня 1931, в. Паганькі, Полацкага раёна, Віцебскай вобласці — 27 студзеня 2013) — беларускі палітык. Герой Сацыялістычнай Працы (1981).
Нарадзіўся 5 жніўня 1931 года ў в. Паганькі Ветрынскага (зараз Полацкага) раёна.
Працоўную дзейнасць пачаў у 1949 годзе брыгадзірам паляводчай брыгады калгаса «Новы шлях».
З 1951 года па 1954 год служыў у Савецкай Арміі.
У 1955—1958 гадах — старшыня выканкамаў Завозерскага, затым Вароніцкага сельсаветаў. У 1958 годзе ў складзе 30-тысячнікаў быў накіраваны старшынёй калгаса імя Сільніцкага. Званне Героя Сацыялістычнай Працы прысвоена ў 1981 годзе.
Дэпутат Вярхоўнага Савета БССР 9-га склікання (1975—1980), абіраўся дэпутатам Вароніцкага сельскага Савета, Полацкага раённага і Віцебскага абласнога Саветаў.
Памёр 27 студзеня 2013 года. Пахаваны на могілках у в. Варонічы Полацкага раёна. На яго магіле ў 2014 годзе ўсталяваны бюст[1][2].