У Вікіпедыі ёсць артыкулы пра іншых асоб з прозвішчам Заблоцкі. Францішак Заблоцкі (польск.: Franciszek Zabłocki; 2 студзеня 1752 года — 10 верасня 1821, Коньскаволя каля Пулаў) — польскі адукацыйны дзеяч, паэт, больш знакаміты як аўтар камедый польскага асветніцтва.
З 1774 года працаваў у Камісіі народнай асветы, пасля — Таварыстве элементарных кніжак і камісіі адукацыі Варты законаў. Удзельнічаў у паўстанні Касцюшкі. Па задушэнні паўстання выехаў у Рым, дзе быў пасвечаны ў ксяндза.
З 1798 года быў пробашчам у Гуры Пулаўскай, а з 1800 года — ў Коньскаволі. Там апекаваўся над псіхічна хворым паэтам Францішкам Дыянізам Князьнінам.
Аўтар больш чым 50 камедый, у якіх атакаваў сарматызм і адсталасць. Перакладаў таксама творы з іншых моў.