Файфель (Файвель) Ісакавіч Гаўзе (15 красавіка 1897, г. Слуцк, Мінская вобласць — 18 студзеня 1990) — беларускі юрыст. Доктар юрыдычных навук (1965), прафесар.
Скончыў Харкаўскі інстытут народнай гаспадаркі (прававое аддзяленне, 1921).
Працаваў у Народным камісарыяце юстыцыі Беларускай ССР (1921—1929, следчы, загадчык натарыяльнага аддзела, загадчык заканадаўча-кадыфікацыйнага аддзела), Алма-Ацінскім юрыдычным інстытуце, Мінскім юрыдычным інстытуце (дацэнт кафедры грамадзянскага права, у 1945—1950 — загадчык кафедры), Беларускім дзяржаўным ўніверсітэце (1923—1928 і з 1954, прафесар кафедры грамадзянскага права).
Навуковыя інтарэсы: праблемы грамадзянскага, сямейнага права; гісторыя права Беларусі; кадыфікацыя заканадаўства.