Уладзімір Мітрафанавіч Свяжы́нскі (нар. 28 красавіка 1945, в. Новыя Турасы, Ульскі раён, Віцебская вобласць, цяпер Ушацкі раён) — беларускі лінгвіст, літаратуразнавец, гісторык. Кандыдат філалагічных навук (1978).
Скончыў у 1971 годзе БДУ. 3 1971 у Інстытуце мовазнаўства, з 1993 у Інстытуце гісторыі НАН Беларусі.
Асноўныя сферы навуковых інтарэсаў — дыяхранічная сацыялінгвістыка, а таксама мемуарыстыка ВКЛ 16—18 ст. Найважнейшыя працы: «„Гістарычныя запіскі“ Ф. Еўлашоўскага» (Мінск, 1990); Гістарычны слоўнік беларускай мовы, Т. 1—22 (Мінск, 1982—2002; у сааўтарстве); Мова беларускай пісьменнасці XIV—XVIII стст. (Мінск, 1988; у сааўтарстве); Мова выданняў Францыска Скарыны (Мінск, 1990; разам з А. М. Булыкам, А. Л. Жураўскім); удзельнічаў у падрыхтоўцы да выдання Кнігі № 28 Метрыкі ВКЛ (Мінск, 2000).