Уладзімір Ільіч Сізо́ў[2] (руск.: Владимир Ильич Сизов; 1840 — 1 лістапада 1904) — расійскі археолаг, гісторык, музейны дзеяч.
Нарадзіўся ў Маскве. Вучыўся ў Сімферопальскай гімназіі. У 1858 годзе скончыў 1-ю Маскоўскую гімназію[3]. У 1858—1862 гадах вучыўся на фізіка-матэматычным факультэце Маскоўскага ўніверсітэта, слухаў лекцыі на гісторыка-філалагічным факультэце. У 1865 годзе здаў кандыдацкі экзамен па юрыдычнаму факультэту[4]. Выкладаў у гімназіі ў Кутаісі. У 1870—1880 гадах выкладаў у Мікалаеўскім сіроцкім інстытуце ў Маскве. У 1881—1887 гадах сакратар, у 1887—1904 гадах вучоны сакратар Гістарычнага музея.
Быў членам Маскоўскага археалагічнага таварыства з 1877 года. Займаўся даследаваннем славянска-рускіх старажытнасцей. У В 1881—1883, 1885, 1894, 1896, 1898, 1901 гадах праводзіў раскопкі ў вярхоўях Дняпра, каля вёскі Гнёздава Смаленскай вобласці, каля вёсак Чырвоная Слабада, Туравічы (Магілёўская вобласць), Іпалітаўка (Гомельская вобласць), на Кубані, Доне, Чарнаморскім узбярэжжы Каўказа і інш.
Адзін з першых даследчыкаў помнікаў старажытнарускай дружыннай культуры, культуры доўгіх курганоў, дзякаўскай культуры[4]. Кансультаваў пастаноўкі Маскоўскай оперы, чытаў лекцыі па гісторыі культуры і касцюма на драматычных курсах, удзельнічаў у рэвізіях Аружэйнай палаты[4].