Тэадор Трыплін (Teodor Tripplin; 13 снежня 1812[1], г. Каліш, Польшча — 25 студзеня 1881) — польскі пісьменнік, падарожнік, лекар; удзельнік паўстання 1830—31 гадоў.
У 1831-40 вывучаў медыцыну ва ўніверсітэтах у Кёнігсбергу і Манпелье. Доктар медыцыны (1840). Падарожнічаў па Еўропе і Паўночнай Афрыцы. У 1849—56 жыў у Варшаве. Атрымаў вядомасць як аўтар аповесці «Пан Зыгмунт у Іспаніі» (т. 1—4, 1852) і «Успамінаў аб падарожжы ў Данію, Нарвегію, Англію, Партугалію і ў дзяржаву мараканскую» (1844) і інш. У 1856 наведаў Беларусь. Па дарозе з Беластока ў Вільню спыняўся ў Гродне; жыў у доме князя Чацвяртынскага, наведваў прыватны музей у горадзе, у якім захоўваліся карціны, малюнкі, старажытная зброя. У 1858 у Вільні выйшаў яго дзённік падарожжа па Беларусі і Жамойці.
Пахаваны ў Варшаве.