«Стальны гігант» (англ.: The Iron Giant) — амерыканскі анімацыйны фільм студыі «Warner Bros. Animation» 1999 года. Пераможца прэмій «Эні» (1999) у намінацыі «Найлепшы анімацыйны поўнаметражны фільм» і прэміі Асацыяцыі кінакрытыкаў Лос-Анджэлеса (1999) за найлепшы анімацыйны поўнаметражны фільм.
Жыхары ціхага амерыканскага мястэчка становяцца сведкамі асляпляльнай успышкі і падзення вялізнага аб’екта. Праз некалькі дзён хлапчук па імі Хогарт Х’юз знаходзіць у наваколлях гіганцкага робата, які прыляцеў на Зямлю з далёкай касмічнай галактыкі.
Нягледзячы на свой грозны выгляд, іншапланетны госць аказваецца добрым стварэннем. Паміж ім і адважным хлапчуком завязваецца сапраўднае сяброўства. Але ўрад даведаўся аб існаванні робата, і вайскоўцы вырашылі знішчыць прышэльца. Хогарт — адзіны, хто можа выратаваць стальнога гіганта.