У гэтага паняцця ёсць і іншыя значэнні, гл. Святагорскі манастыр.
Святаго́рскі Свя́та-Успе́нскі манасты́р — праваслаўны мужчынскі манастыр у пасёлку Пушкінскія Горы Пскоўскай вобласці (Расія). Помнік архітэктуры 16—19 ст.
Размяшчаецца на Святых (былых Сінічых) гарах. Уваходзіць у склад Музея-запаведніка Пушкіна.
На тэрыторыі манастыра знаходзіцца магіла А. С. Пушкіна і яго продкаў.
Манастыр заснаваны ў 1569 годзе як мужчынскі на Сінічых гарах. Пасля 1918 у саборы была экспазіцыя, прысвечаная Пушкіну. У Вялікую Айчынную вайну манастыр быў моцна пашкоджаны. Адноўлены. З 1990-х гадоў храм дзейнічае. Святагорскі манастыр уваходзіць у склад Музея-запаведніка Пушкіна.
Ансамбль манастыра абнесены пабеленымі каменнымі сценамі і Анастасіеўскай і Святой брамамі.
На вяршыні ўзгорка — мураваны 4-стаўповы 3-апсідны 1-купальны Успенскі сабор (16 ст.) з традыцыйнымі рысамі Пскоўскай школы дойлідства. У ветразевых скляпеннях і верхняй частцы праслаў сабора ўстаноўлены галаснікі.
У ансамбль Святагорскага манастыра ўваходзяць таксама званіца ў стылі класіцызму (завершана ў 1821; у яе верхнім ярусе размяшчаўся гадзіннік), брацкі корпус з трапезнай, гасцініца.