У Вікіпедыі ёсць артыкулы пра іншых асоб з прозвішчам Шухевіч. Рама́н Іо́сіфавіч Шухе́віч (30 чэрвеня 1907, Львоў, Аўстра-Венгрыя — 5 сакавіка 1950, Білагоршча, цяпер Львоў) — украінскі палітычны і дзяржаўны дзеяч.
Член галіцкага краявога проваду Арганізацыі ўкраінскіх нацыяналістаў. Камандзір з боку ўкраінцаў падраздзялення «Нахтыгаль» у складзе замежных легіёнаў Вермахту (1941—1942). У 1942 годзе каля дзевяці месяцаў служыў на акупаванай тэрыторыі Віцебскай вобласці БССР, удзельнічаў у барацьбе супраць партызан у складзе 201-га ахоўнага батальёна паліцыі, меў званне гаўптмана[3]. Генерал-харунжы, галоўнакамандуючы Украінскай паўстанцкай арміі, старшыня Сакратарыята Украінскай галоўнай вызваленчай рады (1943—1950). Забіты ў час перастрэлкі з групай супрацоўнікаў савецкіх спецслужб. Узнагароджаны званнем Герой Украіны пасмяротна ўказам прэзідэнта Украіны Віктара Юшчанкі ад 12 кастрычніка 2007 года. 21 красавіка 2010 года Данецкі апеляцыйны адміністрацыйны суд прызнаў указ Юшчанкі незаконным і адмяніў яго. Рашэнне суда ўступіла ў сілу ў 2011 годзе[4].