«Партрэт Міхала VІ Гераніма Радзівіла» — карціна са збораў Нясвіжскага замка, напісаная, верагодна, у ХІХ стагоддзі. Месцазнаходжанне невядома[1].
Да 1939 г. у калекцыі князёў Радзівілаў у Нясвіжы (№ 177 ў інвентары 1928 г. і вопісе 1939 г.). Міхал VІ Геранім паходзіў з нясвіжскай лініі роду Радзівілаў. Малодшы сын Марціна І Мікалая, крайчага вялікага літоўскага, і Марты з Трамбіцкіх. Захаваўся фотаздымак у Архіве галоўных старажытных актаў у Варшаве. Партрэт дакладна паўтарае вобраз Міхала VІ Гераніма з палаца ў Небарове[ru], датаваны 1785 г., аўтарства вядомага мастака Антона Графа. Ад апошняга нясвіжскі варыянт адрозніваецца надпісам вакол выявы князя. Верагодна, у замку знаходзілася пазнейшая копія, выкананая ў часы актыўнага папаўнення галерэі Марыяй Даротай Радзівіл з Кастэлянаў. Партрэт таксама адлюстраваны на фотаздымку інтэр’ера пакоя княгіні. Існаваў парны партрэт жонкі Алены Пшаздзецкай такога ж фармату і з падобным надпісам[1].
Пасля 1939 г. партрэт трапіў у Мінск, адкуль, верагодна, вывезены ў Германію ў 1944 г. Сучаснае месцазнаходжанне невядома[1].