Мі́зерышкі — возера ў Браслаўскім раёне Віцебскай вобласці Беларусі ў басейне ракі Друйка, за 8 км у напрамку на паўднёвы захад ад горада Браслаў, за 0,9 км на захад ад вёскі Майшулі.
Плошча паверхні 0,12 (0,13[1]) км². Даўжыня 0,55 (0,56[1]) км, найбольшая шырыня 0,3 (0,33[1]) км, даўжыня берагавой лініі 1,47 (1,6[1]) км. Плошча вадазбору 1 км². Аб’ём вады ў возеры 0,24[1] млн м³.
Катлавіна возера выцягнутая ў напрамку з захаду на ўсход. Схілы катлавіны вышынёй да 7 м, спадзістыя. Берагі пераважна нізкія і забалочаныя. Мелкаводдзе пясчанае, глыбей дно возера ілістае[1]. Вакол возера забалочаная пойма шырынёй 50—100 м. У паўночнай частцы выцякае ручай, злучаючы Мізерышкі з возерам Рака.
У возеры водзяцца акунь, шчупак звычайны, плотка, лінь і іншыя віды рыб[1].