Мускаві́т — мінерал групы слюд, складаны гідрааксід-алюмасілікат калію, KAl2AlSi3O102.
Назва паходзіць ад англ.: muscovite, утворанага з англ.: Muscovy, ад старажытнай назвы Расіі Масковія, адкуль мускавіт быў завезены ў краіны Еўропы.
Крышталізуецца ў манакліннай, зрэдку трыганальнай сінганіях. Утварае кароткаслупкаватыя і пласціністыя крышталі, ліставатыя, лускаватыя і іншыя агрэгаты. У тонкіх пласцінах бясколерны, у больш тоўстых набывае шэрае, ружаватае, жаўтаватае, зеленаватае адценні. Бляск шкляны, на плоскасцях спайнасці перламутравы і серабрысты. Цвёрдасць 2—3. Шчыльнасць 2,8—2,9 г/см³.
Мінерал магматычнага і метамарфічнага паходжання.
Выкарыстоўваецца ў будаўнічай, хімічнай, фарфоравай, электра- і радыёпрамысловасці.