У Вікіпедыі ёсць артыкулы пра іншых асоб з прозвішчам Жукава. Марыя Навумаўна Жукава (нар. 3 сакавіка 1909, в. Качана, Віцебская губерня — 1974) — доктар медыцынскіх навук, прафесар.
Скончыла Магілёўскі медыцынскі тэхнікум, працавала акушэркай. У 1939 годзе скончыла 2-гі Ленінградскі медыцынскі інстытут. Яе спецыялізацыя — дыягностыка і лячэнне захворванняў мачаточнікаў, нырак і звязаных з імі жыццёва важных органаў чалавека.
У Вялікую Айчынную вайну працавала хірургам-уролагам у медыцынска-санітарных падраздзяленнях Волхаўскага фронту. Пасля вайны ў Ленінградзе, асістэнт кафедры ўралогіі Інстытута ўдасканалення ўрачоў імя С. М. Кірава. У 1952 годзе абараніла доктарскую дысертацыю, загадвала кафедрай уралогіі Беларускага інстытута ўдасканалення ўрачоў. З 1958 года зноў у Ленінградзе, загадчык кафедры ўралогіі Ленінградскага інстытута ўдасканалення ўрачоў.
Унесла вялікі ўклад у развіццё медыцынскай навукі. Пад яе кіраўніцтвам падрыхтавана 12 кандыдатаў медыцынскіх навук, 3 яе вучні сталі дактарамі медыцынскіх навук.