Мардэхай Ардон (пры нараджэнні Макс (Мордхэ Эліэзер) Бранштэйн; 13 ліпеня 1896, Тухаў, Галіцыя, Аўстра-Венгрыя — 18 чэрвеня 1992, Іерусалім) — ізраільскі мастак.
Нарадзіўся ў веруючай яўрэйскай сям’і, на тэрыторыі цяперашняй Польшчы. У 1921—1825 гадах ён вучыўся ў школе Баухауса ў Дэсаў, дзе яго выкладчыкамі былі Паўль Клее, Васіль Кандзінскі, Ліянель Фейнінгер і Іаганес Ітэн. Асабліва моцным аказаўся ўплыў на работы М. Ардона творчасці П. Клее. У 1926 годзе М. Ардон паступае ў мюнхенскую Акадэмію мастацтваў і пад кіраўніцтвам Макса Дзёрнера знаёміцца з тэхнікай малюнка старых майстроў. Асабліва мастак знаходзіўся пад уражаннем жывапісу Рэмбранта і Эль Грэка.
У 1933 годзе, пасля прыходу ў Германіі да ўлады НСДАП, М. Ардон эмігрыруе ў брытанскую Палесціну. Тут ён выкладае ў заснаванай у 1906 годзе Школе мастацтваў Бецалель (цяпер — Акадэмія мастацтваў і дызайну Бецалель). Адным з яго вучняў быў Якаў Агам, адзін з заснавальнікаў кінетычнага мастацтва. У 1959 годзе М. Ардон прымаў удзел у міжнароднай выстаўцы сучаснага мастацтва documenta II у Каселі. У 1963 годзе яму прысудзілі Дзяржаўную прэмію Ізраіля.
У 2014 годзе яго карціна «Абуджэнне» (1969) была прададзена на Sotheby’s за 821 000 долараў.