Лё́тцы — возера ў Беларусі ў Віцебскім раёне Віцебскай вобласці ў басейне ракі Шэвінка. Знаходзіцца за 15 км на паўднёвы ўсход ад Віцебска каля вёскі Вялікія Лётцы.
Плошча паверхні возера 0,31 км², даўжыня 1,28 км, найбольшая шырыня 0,35 км. Найбольшая глыбіня возера дасягае 3,7 м. Аб’ём вады 0,84 млн м³.
Катлавіна возера тэрмакарставага тыпу. Схілы катлавіны вышынёй 25—30 метраў, складзеныя з суглінкаў і супесяў. Берагавая лінія слабазвілістая. Берагі зліваюцца са схіламі катлавіны. Дно возера да глыбіні 1,5—2 м выслана пяском і апясчаненымі адкладамі, на большых глыбінях глеістае.
Возераэўтрофнае, праточнае. Працякае рака Вужніца, упадаюць ручаі. Да глыбіні ў 1 м зарастае. Прыбярэжная расліннасць займае паласу 5—20 м. Падводная расліннасць распаўсюджана да глыбіні 2,4 м.
У возеры водзяцца лешч, шчупак, лінь, плотка, карась і іншыя віды рыб.
Каля возера Лётцы праходзіць аўтамабільная дарога Р151.