Леанар Лімазен (фр.: Léonard Limosin; 1505, Лімож — 1575/1577, там жа) — французскі жывапісец на эмалі і шкле, гравёр XVI стагоддзя.
Нарадзіўся ў 1505 годзе, каля 1525 года наведваў фантанеблоскую школу. Мяркуецца, што ён вучыўся ў Нардона Пеніка. З 1530 года працаваў на ліможскай эмалевай мануфактуры. Пры каралю Францыску I быў яе дырэктарам і прыдворным жывапісцам; карыстаўся таксама літасцю ў Генрыха II і памёр прыблізна ў 1575 годзе.
Яго самая ранняя праца падпісана Л. Л. і датавана 1532 годам. У першых сваіх эмальерна-жывапісных творах трымаўся старафранцузскага напрамку, але з 1535 года пачаў пераймаць італьянцаў, пераважна Рафаэля.