Крыварожскі дзяржаўны педагагічны ўніверсітэт (укр.: Криворізький державний педагогічний університет) — украінская дзяржаўная вышэйшая навучальная ўстанова са статусам універсітэта, размешчаная ў Крывым Розе.
Заснаваны ў 1930 годзе як Крыварожскі інстытут прафесійнай адукацыі. Рыхтаваў настаўнікаў фізікі, матэматыкі, гісторыі і палітэканоміі, мовы і літаратуры. У 1933 годзе Інстытут прафесійнай адукацыі быў рэарганізаваны ў педагагічны інстытут. У даваенны перыяд інстытут падрыхтаваў каля 1000 настаўнікаў. 16 сакавіка 1999 года Пастановай Кабінета Міністраў Украіны на базе Крыварожскага дзяржаўнага педагагічнага інстытута створаны Крыварожскі дзяржаўны педагагічны ўніверсітэт. З 1992 года ў ВНУ функцыянуе аспірантура, на кафедрах працуе больш за 120 яе выпускнікоў. За гады функцыянавання аспірантуры падрыхтавана больш за 110 кандыдатаў навук. У 2011 годзе быў створаны Крыварожскі нацыянальны ўніверсітэт, які аб’яднаў Крыварожскі тэхнічны ўніверсітэт, Крыварожскі дзяржаўны педагагічны ўніверсітэт, Крыварожскі эканамічны інстытут КНЭУ, Крыварожскі факультэт НМетАУ. 27 студзеня 2016 года распараджэннем Кабінета міністраў Украіны Крыварожскі педагагічны інстытут зноў выдзелены са складу Крыварожскага нацыянальнага ўніверсітэта з аднаўленнем на яго базе Крыварожскага дзяржаўнага педагагічнага ўніверсітэта.