Карл Аксель Готлунд (шведск.: Carl Axel Gottlund, фінск.: Kaarle Aksel Gottlund; 24 лютага 1796, Стромфорс — 20 красавіка 1875, Хельсінкі) — фінскі мовазнавец і фалькларыст, грамадскі дзеяч, адзін з заснавальнікаў фінскага рамантызму.
Нарадзіўся на поўдні Фінляндыі ў сям’і лютэранскага святара. З дзяцінства цікавіўся фінскай мовай. Навучаўся ў акадэміі ў Турку. Працаваў ва Упсальскім універсітэце і Хельсінкскім універсітэце. Падчас працы ў Швецыі збіраў фальклор лясных фінаў, склаў праект стварэння фінскай аўтаноміі ў складзе Швецыі (на той час тэрыторыя Фінляндыі ўжо ўвайшла ў склад Расіі). У 1834 г. вярнуўся ў Фінляндыю, дзе працягваў навуковую дзейнасць.
Працы Карла Акселя Готлунда аказалі значны ўплыў на вывучэнне дыялектных асаблівасцяў фінскай мовы, фарміравання літаратурнай традыцыі. Пісаў на фінскай, шведскай і лацінскай мовах.