Дама́мерыцкі сельсавет — адміністрацыйна-тэрытарыяльная адзінка ў складзе Клімавіцкага раёна Магілёўскай вобласці Беларусі. Цэнтр — аграгарадок Палошкава.
Дамамерыцкі сельсавет размешчаны на поўначы раёна, мяжуе з Гусаркаўскім і Кісялёвабудскім сельсаветамі Клімавіцкага раёна, Краснабудскім сельсаветам Крычаўскага раёна, Шумяцкім раёнам Смаленскай вобласці Расійскай Федэрацыі.
Утвораны 20 жніўня 1924 года ў складзе Клімавіцкага раёна Калінінскай акругі БССР. Цэнтр — вёска Дамамерычы. З 9 чэрвеня 1927 года сельсавет у Клімавіцкім раёне Магілёўскай акругі. Пасля скасавання акруговай сістэмы 26 ліпеня 1930 года ў Клімавіцкім раёне БССР, з 20 лютага 1938 года — Магілёўскай вобласці. 11 красавіка 1960 года да сельсавета далучана частка скасаванага Хатовіжскага сельсавета (4 населеныя пункты: Ганнаўка, Пянькоўка, Хадунь і Хатовіж)[1]. 12 лютага 2010 года цэнтр сельсавета перанесены з вёскі Дамамерычы ў вёску Палошкава[2], якая адначасова атрымала статус аграгарадка[3].
У склад сельсавета ўваходзяць 11 населеных пунктаў (2015 г.):
| Населены пункт | Статус | Насельніцтва | Гаспадаркі |
|---|---|---|---|
| Барсукі | вёска | 709 | 338 |
| Барысаўка | вёска | 38 | 18 |
| Ганнаўка | вёска | 1 | 1 |
| Дамамерычы | вёска | 88 | 41 |
| Залессе | вёска | 21 | 8 |
| Новыя Дамамерычы | вёска | 18 | 11 |
| Палошкава | аграгарадок | 380 | 131 |
| Пянькоўка | вёска | 55 | 28 |
| Хадунь | вёска | 34 | 25 |
| Хатовіж | вёска | 122 | 55 |
| Царковішча | вёска | 39 | 17 |
| Крыніца: Клімавіцкі райвыканкам[4] | |||
Насельніцтва сельсавета паводле перапісу 2009 года — 1462 чалавекі[5], з іх 85,6 % — беларусы, 10,7 % — рускія, 2,1 % — украінцы, 1,2 % — армяне[6]. Станам на 2015 год насельніцтва Дамамерыцкага сельсавета складала 1504 чалавекі, на 1 студзеня 2021 года — 1377 чалавек.