Георгій Рыгоравіч Гулюк (нар. 23 ліпеня 1944, в. Яромічы, Кобрынскі раён) — дзяржаўны дзеяч, доктар сельскагаспадарчых навук, прафесар. Галоўны рэдактар часопіса «Мелиорация и водное хозяйство».
У 1962—1963 гадах працаваў лабарантам у Мінянскай сярэдняй школе. Потым служба ў Савецкай арміі (1963—1966).
У 1966—1973 гадах — рабочы, брыгадзір, прараб у Яромiцкай МТС. З 1973 па 1977 год галоўны інжынер, начальнік ПМК у г. Маларыта.
У 1977 годзе накіраваны на працу ў Валагодскую вобласць, дзе працаваў галоўным інжынерам, начальнікам аб’яднання «Волагдамеліярацыя», затым намеснікам старшыні аб’яднання «Волагдааграбуд». Выбіраўся членам Валагодскага абкама КПСС і аблвыканкама.
У 1979 годзе скончыў Горацкую сельскагаспадарчую акадэмію па спецыяльнасці «Гідрамеліярацыя».
У 1988 годзе пераведзены на работу ў Маскву. У 1988—1999 гадах ён працаваў намеснікам старшыні Дзяржаграпрама Нечарназёмнай зоны РСФСР, прэзідэнтам акцыянернай аграбудаўніча-прамысловай карпарацыі «Цэнтрінжсельбуд». У 2004—2005 гадах — начальнік Упраўлення меліярацыі і тэхнічнага забеспячэння Федэральнага агенцтва па сельскай гаспадарцы.
Працаваў дырэктарам Дэпартамента меліярацыі і тэхнічнага забеспячэння Міністэрства сельскай гаспадаркі Расійскай Федэрацыі. Віцэ-прэзідэнт Міжнароднай камісіі па ірагацыі і дрэнажу, член калегіі Міністэрства сельскай гаспадаркі РФ. З’яўляецца дзяржаўным саветнікам Расійскай Федэрацыі 2 класа (класны чын прысвоены Указам Прэзідэнта РФ ад 11 сакавіка 2008 года).
Узнагароджаны ордэнам Пашаны, медалём «За пераўтварэнне Нечарназем’я РСФСР» і 8 медалямі. З’яўляецца Заслужаным меліяратарам Расійскай Федэрацыі.