У Вікіпедыі ёсць артыкулы пра іншых асоб з прозвішчам Палянская. Галіна Уладзіміраўна Палянская (нар. 10 чэрвеня 1950, г. Валгаград, РСФСР) — беларускі архітэктар. Кандыдат архітэктуры, дацэнт.
Скончыла БПІ, аспірантуру Славацкай вышэйшай тэхнічнай школы. Працавала архітэктарам у праектным інстытуце «Мінскпраект»; асістэнтам, старэйшым выкладчыкам, дацэнтам кафедры «Горадабудаўніцтва», намеснікам дэкана, дэканам архітэктурнага факультэта БПІ (пасля БНТУ).
З 2004 года дэпутат Палаты прадстаўнікоў Нацыянальнага сходу Рэспублікі Беларусь. Старшыня пастаяннай камісіі па жыллёвай палітыцы, будаўніцтве, гандлі і прыватызацыі Палаты Прадстаўнікоў Нацыянальнага сходу Рэспублікі Беларусь. Кіраўнік дэлегацыі Нацыянальнага сходу Рэспублікі Беларусь у Міжпарламенцкай асамблеі праваслаўя, старшыня камісіі па адукацыі ў Міжпарламенцкай асамблеі праваслаўя, кіраўнік рабочай групы Нацыянальнага сходу Рэспублікі Беларусь па супрацоўніцтве са славацкім парламентам, член рабочай групы Нацыянальнага сходу Рэспублікі Беларусь па працы з нямецкім парламентам.
Член горадабудаўнічага савета Камітэта архітэктуры Мінгарвыканкама, намеснік старшыні Мінскай гарадской арганізацыі грамадскага аб’яднання «Белая Русь», член Савета Беларускага саюза архітэктараў.
Узнагароджана медалём «За працоўныя заслугі» (6 снежня 2011)[1], ордэнам прападобнай Ефрасінні Полацкай (20 кастрычніка 2020)[2], медалём ордэна прападобнай Ефрасінні Полацкай Беларускай праваслаўнай царквы, Ганаровымі граматамі Нацыянальнага сходу Рэспублікі Беларусь, Мінгарвыканкама, Мінаблвыканкама. Ганаравана званнем «Мінчук года». Мае падзяку Прэзідэнта Рэспублікі Беларусь.