У Вікіпедыі ёсць артыкулы пра іншых асоб з прозвішчам Абуховіч. Віктар Станіслававіч Абуховіч (27 ліпеня 1930, в. Струпіна, Гродзенскі раён — 27 жніўня 2015) — беларускі эканаміст. Доктар эканамічных навук (1986), прафесар (1991).
Скончыў Гродзенскі дзяржаўны сельскагаспадарчы інстытут (спецыяльнасць «Заатэхнія», 1959), Беларускі навукова-даследчы інстытут жывёлагадоўлі (аспірантура, 1968).
Працаваў галоўным заатэхнікам Жалудоцкага раённага ўпраўлення сельскай гаспадаркі Гродзенскай вобласці, інспектарам Гродзенскага вытворчага калгасна-саўгаснага ўпраўлення. Быў супрацоўнікам Беларускага навукова-даследчага інстытута жывёлагадоўлі (1967—1988, старшы навуковы супрацоўнік, загадчык лабараторыі арганізацыі і эканомікі вытворчасці ялавічыны, загадчык аддзела тэхналогіі вытворчасці ялавічыны), выкладчыкам Беларускай дзяржаўнай сельскагаспадарчай акадэміі (з 1989, прафесар кафедры аграбізнесу).
Навуковыя інтарэсы: праблемы інтэнсіфікацыі жывёлагадоўлі ў комплексах індустрыяльнага тыпу; аграпрамысловая інтэграцыя суб’ектаў гаспадарання ў прадуктовым падкомплексе.