У Вікіпедыі ёсць артыкулы пра іншых асоб з прозвішчам Бортнік. Вячаслаў Бортнік (нар. 22 чэрвеня 1974, Гомель, Беларусь) — беларуска-амерыканскі грамадскі дзеяч, праваабаронца, адукатар, псіхолаг, актывіст ЛГБТ-руху. Сябра Рады Беларускай Народнай Рэспублікі.
Сям’я Вячаслава Бортніка паходзіць са шляхецкіх радоў Гулевічаў і Гатальскіх.
Скончыў Гомельскі дзяржаўны ўніверсітэт імя Францыска Скарыны ў 1996 г. Мае дыпломы магістра палітычных навук і дзяржаўнага кіравання ЕГУ (2004 г.) і Амерыканскага ўніверсітэта (Вашынгтон, 2010 г.) адпаведна. Вучыўся ў Акадэміі паслядыпломнай адукацыі (Мінск, 2001—2004). Скончыў шэраг мiжнародных праграм па правах чалавека ў Манрэалі, Жэневе, Сан-Паўлу i Варшаве. У Беларусі працаваў настаўнікам сярэдняй школы ў вёсцы Насовічы (Добрушскі раён), дзіцячым псіхолагам у Гомелi, выкладаў псіхалогію ў Гомельскім дзяржаўным універсітэце, кансультаваў недзяржаўныя арганізацыі. У беларускім праваабарончым руху з 1995 г. У 2002—2006 гг. узначальваў Беларускі філіял Amnesty International. Браў актыўны ўдзел у палiтычным жыццi Беларусi, у тым ліку, у складзе iнiцыятыўных груп кандыдатаў у прэзiдэнты Юрыя Глушакова і Алеся Міхалевіча ў 2010 г. Назiраў за прэзідэнцкімі выбарамі ў 2010 г. на выбарчым участку ў Вашынгтоне. Пераследваўся беларускiмi ўладамi за праваабарончую дзейнасць, неаднаразова затрымліваўся міліцыяй у 2005 i 2006 гг.[1]
Далучыўся да Беларуска-амерыканскага Задзiночання (БАЗА) ў 2008 г. і служыў на пасадах сакратара, кiраўнiка прэсавай службы, намеснiка старшынi і старшынi Вашынгтонскага гуртка БАЗА.[2][3] Браў удзел у арганiзацыi шматлiкiх акцый пратэсту супраць рэжыму Лукашэнкі(бел. (тар.)) бел..[4][5][6][7]
У эмiграцыi з 2013 г. З чэрвеня 2015 г. — сябра Галоўнай Управы БАЗА, у 2015—2017 гг. — намеснiк старшыні.[8] У 2016—2017 гг. служыў адным з кіраўнікоў Беларускага інстытута Амерыкі. У сакавiку 2016 г. абраны Сакратаром Рады БНР.[9] Абавязкi выконваў да лiстапада 2019 г. У 2018—2019 гг. выконваў абавязкi Скарбнiка Рады БНР. У лiпенi 2017 г. абраны ў склад Вялiкай Рады Згуртавання беларусаў свету «Бацькаўшчына».[10] З жнiўня 2019 г. — сакратар Вашынгтонскага аддзела БАЗА.
У 2012—2020 гг. з’яўляўся спецыялістам па Беларусі, Малдове і Украіне і старшынёй Каардынацыйнай групы па Еўразіі ў Amnesty International USA.[11] З кастрычнiка 2019 г. на дзяржслужбе ЗША. Мае больш за 100 публікацый па правах чалавека, некамерцыйных арганізацыях, міжнароднаму развіццю, адукацыі і іншых пытаннях. Валодае беларускай, рускай, ангельскай, польскай, нямецкай i ўкраiнскай мовамi. Жыве у Вашынгтоне. Католiк.
Рэгулярна выступае ў беларускіх СМІ, у тым лiку, з заявамі і каментарамі ў падтрымку правоў ЛГБТ[12][13].
Шырокі розгалас у беларускіх СМІ атрымаў аднаполы шлюб Вячаслава Бортніка з Шонам Гейлордам, заключаны 11 ліпеня 2013 года ў Вашынгтоне[14].
Узнагароджаны Медалём да стагоддзя БНР Рады Беларускай Народнай Рэспублікі.[15]