Бардоскі ўніверсітэт
Бардоскі ўніверсітэт (фр.: Université de Bordeaux) — французская дзяржаўная вышэйшая навучальная ўстанова са статусам універсітэта з сядзібай у горадзе Бардо.
Агульная характарыстыка
Ва ўніверсітэце навучаецца больш за 50 тысяч студэнтаў і працуе больш за 4 тысячы выкладчыкаў і даследчыкаў у галіне гуманітарных і сацыяльных навук, навук аб жыцці, тэхнічных і інжынерных навук і інш. Гэта найбуйнейшы ўніверсітэт у рэгіёне Новая Аквітанія. Ён мае некалькі кампусаў у Бардо, у тым ліку ва ўніверсітэцкім раёне Таланс-Песак-Градзіньян, а таксама ў гарадах Ажэн і Перыгё. Вытокі ўніверсітэта ў Бардо ўзыходзяць да часоў антычнасці і сярэднявечча. З 1 студзеня 2014 года ў Бардо функцыянуюць два ўніверсітэты: Бардоскі ўніверсітэт і Бардоскі ўніверсітэт імя Мішэля дэ Мантэня.
Гісторыя
Яшчэ ў 286 годзе нашай эры рымлянамі ў гэтых мясцінах была створана навучальная ўстанова. У той час горад быў важным адміністрацыйным цэнтрам Рымскай імперыі, і навучальная ўстанова павінна была рыхтаваць чыноўнікаў для наваколля.
Уласна ўніверсітэт у Бардо быў заснаваны булай Папы Яўгена IV 7 чэрвеня 1441 года, калі Бардо знаходзіўся пад панаваннем англічан. Ініцыятыва стварэння ўніверсітэта належыць архібіскупу Пію Берланду. Першапачаткова ён складаўся з чатырох факультэтаў: мастацтваў, медыцыны, права і тэалогіі. Юрыдычны факультэт пазней падзяліўся на факультэты цывільнага і кананічнага права.
У 1793 годзе падчас Вялікай французскай рэвалюцыі Нацыянальны канвент закрыў універсітэт і замяніў яго школай у 1796 годзе. Напалеон аднавіў універсітэт у 1808 годзе. 10 ліпеня 1896 года ўлады Трэцяй рэспублікі перазаснавалі ўніверсітэт.
Праз майскія хваляванні 1968 года ўніверсітэт, як і многія іншыя французскія ўніверсітэты, быў падзелены ў 1970 годзе на тры драбнейшыя асобныя ўстановы:
- Універсітэт Бардо 1
- Універсітэт Бардо 2
- Універсітэт Бардо 3
У 1995 годзе Універсітэт Бардо 4 аддзяліўся ад Універсітэта Бардо 1. У 2007 годзе ўніверсітэты былі аб’яднаныя ў супольнасць універсітэтаў Аквітаніі.
З 1 студзеня 2014 года ўніверсітэты горада Бардо былі аб’яднаныя, за выключэннем Універсітэта Бардо ІІІ, які вырашыў не ўдзельнічаць у зліцці.
Зноскі
Спасылкі
На Вікісховішчы ёсць медыяфайлы па тэме Бардоскі ўніверсітэт- Афіцыйная інтэрнэт-старонка ўстановы
Катэгорыя·Вікіпедыя·Артыкулы з пераазначэннем значэння з Вікідадзеных
Катэгорыя·Універсітэты Францыі
Катэгорыя·Універсітэты паводле алфавіта
Category:%D0%A1%D1%82%D0%B0%D1%80%D0%BE%D0%BD%D0%BA%D1%96 %D0%B7 %D0%BA%D0%B0%D1%80%D1%82%D0%B0%D0%BC%D1%96
Катэгорыя·Бардо
Катэгорыя·Навучальныя ўстановы, заснаваныя ў 1441 годзе