Атыдэ́я[1], Вушка[2] (Otidea) — род сумчатых грыбоў сямейства Піранемавыя (Pyronemataceae) парадку Пецыцавыя (Pezizales).
Пладовыя целы (апатэцыі) буйныя, аднабока развітыя, вухападобныя, з завернутымі ўсярэдзіну краямі, каля асновы звужаныя ў ножку, мясістыя, ярка-афарбаваныя або карычнева-бурых таноў, звонку гладкія, з гіменіем на ўвагнутай паверхні, сядзяць групамі, радзей адзіночныя. Сумкі цыліндрычныя, 8-споравыя. Сумкаспоры эліпсоідныя, бясколерныя, гладкія.
Вядома некалькі дзясяткаў відаў, пашыраных у Еўропе, Амерыцы, Індыі, Аўстраліі. На Беларусі трапляюцца атыдэя заячая (Otidea leporina), атыдэя асліная (Otidea onotica).
Сапратрофы. Растуць у лясах на глебе.
Малавядомыя ядомыя грыбы.