Энрыка Бамбі́еры (італ.: Enrico Bombieri; нар. 26 лістапада 1940, Мілан) — італьянскі матэматык. Член Нацыянальнай акадэміі дэі Лінчэі (1976), Нацыянальнай акадэміі навук ЗША (1996), замежны член Французскай акадэміі навук (1984).
Энрыка Бамбіеры скончыў Міланскі ўніверсітэт, пад кіраўніцтвам Джавані Рычы атрымаў ступень Ph.D., і паступіў у Кембрыджскі Трыніці-каледж, дзе быў вучнем Гаральда Дэвенпарта. Пасля гэтага ён выкладаў ва Універсітэце Кальяры і Універсітэце Пізы, а затым эміграваў у ЗША, дзе пачаў працаваць у Інстытуце перспектыўных даследаванняў у Прынстане, штат Нью-Джэрсі.
Энрыка Бамбіеры знакаміты сваімі працамі ў галіне тэорыі лікаў, алгебраічнай геаметрыі і матэматычнага аналізу. Адным з асноўных вынікаў аналітычнай тэорыі лікаў з’яўляецца даказаная ў 1960-х тэарэма Бамбіеры — Вінаградава, якая абагульняе тэарэму Дзірыхле аб простых ліках у арыфметычнай прагрэсіі.