Э́ма Радука́ну (англ.: Emma Raducanu; нар. 13 лістапада 2002 года, Таронта, Канада) — брытанская прафесійная тэнісістка. Пераможца аднаго турніру Вялікага шлема ў адзіночным разрадзе (Адкрыты чэмпіянат ЗША па тэнісе 2021).
У 2021 годзе дэбютавала на адкрытым чэмпіянаце Нотынгема па тэнісе[3][4].
У чэрвені 2021 года дэбютавала на Уімблданскім турніры[5]. Абыграла Віталію Дзячэнка[6] і Маркету Вандроўшаву[7]. Стала наймалодшай брытанскай тэнісісткай, якая выйшла ў трэці раўнд Уімблданскага турніру пасля Алены Балтачы[8]. Пасля перамогі над Саранай Кырсця ў трэцім раўндзе стала наймалодшай брытанскай тэнісісткай у гісторыі, якая выйшла ў чацвёрты раўнд (на той момант ёй было 18 гадоў і 239 дзён)[9][10][11]. У матчы чацвёртага раўнда Уімблданскага турніру супраць Айлы Тамлянавіч знялася з гульні ў другім сэце з-за «праблем з дыханнем»[12].
На пачатку жніўня 2021 года згуляла на турніры Silicon Valley Classic, прайграўшы Чжан Шуай у першым раўндзе[13]. У тым жа месяцы згуляла на турніры WTA 125K series у Чыкага, саступіўшы ў фінале Клары Таўсан[en] (1:6, 6:2, 4:6)[14]. Пасля гэтага яна паднялася на 150-е месца ў рэйтынгу WTA.
Прайшоўшы праз стадыю кваліфікацыі Адкрытага чэмпіянату ЗША 2021 года, Эма Радукану абыграла Штэфані Фегеле, Чжан Шуай, Сару Сарыбес Торма і Шэлбі Роджэрс, выйшаўшы ў чвэрцьфінал турніру[15]. У чвэрцьфінале Эма абыграла Белінду Бенчыч у двух сэтах і выйшла ў паўфінал турніру. Яна стала першай тэнісісткай у гісторыі, якая выйшла ў паўфінал Адкрытага чэмпіянату ЗША з ліку тых, якія прайшлі кваліфікацыю турніру[16]. Пасля перамогі над Марыяй Сакары выйшла ў фінал, не прайграўшы ніводнага сэту на працягу спаборніцтваў[17] і стала першай брытанкай, якая выйшла ў фінал буйнога тэніснага турніру за 44 гады[18]. У фінале 11 верасня 2021 года Эма Радукану ў двух сэтах перамагла Лейлу Фернандэс (6:4, 6:3)[19]. Яна стала пераможцай «US Open», будучы 150-й ракеткай свету [20].
Эма нарадзілася ў Канадзе ў сям’і румына і кітаянкі. Калі дзяўчыне было два гады, бацькі пераехалі з ёй у Лондан (Вялікабрытанія). Пачала гуляць у тэніс у тэніснай акадэміі Бромлі[21].
Эма некалькі раз на год прыязджае ў Бухарэст (Румынія), дзе наведвае сваю бабулю па бацькоўскай лініі. Любіць румынскую кухню[22]. Прыкладамі для пераймання ў тэнісе лічыць Лі На і Сімону Халеп[22][23].