Це́мра[1] — рака ў Пружанскім раёне Брэсцкай вобласці Беларусі, левы прыток ракі Ясельда (басейн Прыпяці).
Даўжыня 20 км[2]. Плошча вадазбору 153 км². Сярэдні нахіл воднай паверхні 0,5 м/км. Пачынаецца за 2 км на паўночны захад ад вёскі Лібярполь, вусце за 0,5 км на ўсход ад вёскі Труханавічы. Цячэ па Нараўска-Ясельдзінскай раўніне ў межах Ружанскай Пушчы. Рэчышча каналізаванае. У вярхоўі ракі створана вадасховішча Гута (Лібярполь). Асноўныя прытокі — Гуцкі канал, рака Парахаўня і канава Козіца (справа).