Хаім Сідар (іўр.: חיים סידר, англ.: Howard Chaim Cedar; нар. 12 студзеня 1943, Нью-Ёрк) — ізраільскі вучоны, член Ізраільскай акадэміі прыродазнаўчых і гуманітарных навук (з 2003 года) і Нацыянальнай акадэміі навук (2022), лаўрэат Прэміі Ізраіля і прэміі Вольфа. Працы ў асноўным прысвечаны біяхіміі, у тым ліку метыліраванню ДНК.
Говард Сідар нарадзіўся ў Нью-Ёрку ў 1943 годзе. Атрымаў ступень бакалаўра навук па матэматыцы ў Масачусецкага тэхналагічнага ўніверсітэта, працягнуў навучанне ў Нью-Ёркскім універсітэце, дзе да 1970 года атрымаў ступені доктара медыцыны і доктара філасофіі ў галіне мікрабіялогіі пад навуковым кіраўніцтвам Джэймса Шварца. У рамках постдактарата вёў навуковыя даследаванні ў Нью-Ёркскім універсітэце пад кіраўніцтвам Эрыка Кэндэла, а затым у Нацыянальных інстытутах аховы здароўя пад кіраўніцтвам Гэры Фелсенфелда.
У 1973 годзе Сідар рэпатрыяваўся ў Ізраіль. Працаваў выкладчыкам Яўрэйскага ўніверсітэта ў Іерусаліме, у 1981 годзе атрымаў прафесарскае званне. У далейшым трое яго студэнтаў атрымалі прэстыжную прэмію маладым вучоным у галіне генетычнай інжынерыі і навукі (англ. GE & Science Prize) як аўтары найлепшых доктарскіх дысертацый. У Хаіма Сідара і яго жонкі Цыпоры шасцёра дзяцей (у тым ліку вядомы ізраільскі кінарэжысёр Ёсеф Сідар) і больш за 20 унукаў.
Хаім Сідар — член EMBO з 1982 года і Ізраільскай акадэміі прыродазнаўчых і гуманітарных навук з 2003 года. У 2022 годзе абраны членам Нацыянальнай акадэміі навук ЗША.