Франц Фердынанд Карл Людвіг Ёзэф фон Габсбург эрцгерцаг д’Эстэ (ням.: Franz Ferdinand von Österreich-Este; 18 снежня 1863, Грац, Аўстра-Венгрыя - 28 чэрвеня 1914, Сараева, Аўстра-Венгрыя) — эрцгерцаг аўстрыйскі, з 1896 спадчыннік прастола Аўстра-Венгрыі.
У палітычным плане Франц Фердынанд быў прыхільнікам ідэі надання часткам імперыі большай аўтаноміі (план Аўрэля Папавічы аб федэралізацыі Аўстра-Венгрыі). Прытрымліваўся мяккай лініі адносна Сербіі, каб не дапусціць адкрытага канфлікту з Расіяй, які зруйнуе абедзве імперыі. Падтрымліваў планы развіцця аўстра-венгерскіх ваенна-марскіх сіл, у той час як ваенна-марская моц увогуле не была прыярытэтам знешняй палітыкі імперыі і ВМС не атрымлівалі належнай падтрымкі ад ураду і грамадства.
Забойства Франца Фердынанда (Сараеўскага забойства) сербскім тэрарыстам Гаўрылам Прынцыпам зрабілася падставай для пачатку Першай сусветнай вайны.