У Вікіпедыі ёсць артыкулы пра іншых асоб з прозвішчам Сямашка.
Уладзімір Ільіч Сямашка (нар. 20 лістапада 1949, Калінкавічы, Гомельская вобласць) — беларускі дзяржаўны дзеяч, са снежня 2014 года па 18 жніўня 2018 года — намеснік Прэм’ер-міністра Рэспублікі Беларусь.
Нарадзіўся 20 лістапада 1949 года ў Калінкавічах.
У 1972 годзе з адзнакай скончыў Беларускі політэхнічны інстытут. Інжынер-механік. Пасля заканчэння інстытута з 1972 па 1974 г. служыў у Савецкай Арміі.
Працоўную дзейнасць пачаў у 1974 годзе ў якасці інжынера-канструктара ў канструктарскім бюро машынабудавання завода ім. Дзяржынскага НВА «Інтэграл». У 1974—1996 гг. працаваў інжынерам-канструктарам, начальнікам КБ-44, начальнікам ТА-4 ОКБМ, галоўным інжынерам АКБМ, галоўным інжынерам машынабудаўнічага комплексу завода імя Ф. Э. Дзяржынскага НВА «Інтэграл». У 1996—2001 гг. працаваў генеральным дырэктарам Мінскага ВА «Гарызонт» — дырэктарам Мінскага завода «Гарызонт».
У 2001 годзе прызначаны на пасаду Міністра энергетыкі Рэспублікі Беларусь.
З ліпеня 2003 па снежань 2003 г. — выконваючы абавязкі Намесніка Прэм’ер-міністра Рэспублікі Беларусь.
Са снежня 2003 года — Першы намеснік Прэм’ер-міністра Рэспублікі Беларусь.
27 снежня 2014 года прызначаны намеснікам прэм’ер-міністра Беларусі[1].
16 кастрычніка 2015 года пастановай Савета Міністраў № 870 у складзе Урада склаў свае паўнамоцтвы перад нававыбраным Прэзідэнтам Рэспублікі Беларусь[2].
13 лістапада 2018 года прызначаны Надзвычайным і Паўнамоцным Паслом Рэспублікі Беларусь у Расійскай Федэрацыі і па сумяшчальніцтве паўнамоцным прадстаўніком Рэспублікі Беларусь пры Эканамічным савеце СНД і пры АДКБ, спецыяльным прадстаўніком Рэспублікі Беларусь па пытаннях інтэграцыйнага супрацоўніцтва ў рамках Саюзнай дзяржавы, ЕАЭС, СНД, АДКБ[3]. Заставаўся паслом у Расіі да 2022 года.