Таўсталобікі або таўсталобы (Hypophthalmichthys) — род прэснаводных рыб сямейства Карпавыя (Cyprinidae). Раней ён падзяляўся на роды Hypophthalmichthys і Aristichthys у складзе падсямейства Hypophthalmichthyinae. У родзе тры сучасныя і адзін вымерлы від.
На Беларусь завезены ў сярэдзіне 1960-х гадоў для сажалкавых гаспадарак, з 1970 года ў некаторыя азёры.
Ілбы таўсталобікаў нашмат шырэйшыя, чым у іншых карпавых (адсюль назва). Іх вочы знаходзяцца ў ніжняй частцы галавы, таму лоб выглядае яшчэ больш.
Даўжыня цела таўсталобікаў да 1 метра (часам больш), а вага ў сярэднім 20—35 кг, хоць сустракаюцца асобіны, вага якіх перавышае 50 кг. Для шэрагу відаў уласціва асаблівае прыстасаванне для фільтрацыі планктону — зрослыя папярочнымі перамычкамі шчэлепавыя тычачкі («сіта»).