Тадэвуш ПАЎЛІКОЎСКІ (польск.: Tadeusz Pawlikowski; 9.11.1861, с. Мядыка Падкарпацкага ваяв., Польшча — 28.9.1915) — польскі рэжысёр і тэатральны дзеяч; рэфарматар польскай сцэны.
Музычную адукацыю атрымаў у Вене, Лейпцыгу, Веймары, тэатральную — у Веймары і Майнінгене (у Л. Кронека). У 1882-93, 1908-12 выступаў як тэатральны і музычны крытык у прэсе Кракава і Львова. У 1898-99 і 1913-15 дырэктар і рэжысёр Кракаўскага, у 1900-06 Львоўскага гарадскіх тэатраў. Ставіў п’есы М. Метэрлінка, Г. Ібсена, Г. Гаўптмана, М. Горкага, А. Чэхава, А. Стрындберга і інш. Прапагандаваў сучасныя яму формы інсцэнізацыі.