У Вікіпедыі ёсць артыкулы пра іншых асоб з прозвішчам Макоўскі.
Тадэвуш Макоўскі (польск.: Tadeusz Makowski; 29 студзеня 1882, Асвенцім — 1 лістапада 1932, Парыж) — польскі мастак.
Тадэвуш Макоўскі ў 1902—1906 гадах вывучаў класічную і польскую філалогію ў Ягелонскім універсітэце ў Кракаве і паралельна вучыўся жывапісу ў мясцовай Акадэміі прыгожых мастацтваў (у 1903—1908 гадах), у класах Яна Станіслаўскага і Ёзэфа Мехофера. На мяжы 1908/1909 гадоў Т. Макоўскі з’ехаў у Парыж, дзе і застаўся да канца жыцця. Спачатку мастак трапіў пад уплыў фрэскавага жывапісу Пюві дэ Шавана. Макоўскі пазнаёміўся з Пабла Пікаса, і паміж імі завязалася сяброўства. Перад Першай сусветнай вайной Т. Макоўскі разам з мастаком Уладзіславам Слявінскім выехаў у Брэтань. Тут ён адышоў ад канонаў кубізму і пачаў «вучыцца ў прыроды». Мастак пісаў пейзажы ў стылі наіўнага рэалізму, а таксама стылізаваныя фігуратыўныя кампазіцыі.