Стужачніцы, Стужкі ордэнскія[1] (Catocalinae) — падсямейства лускакрылых сямейства совак. Пашыраны ў Еўразіі і паўночнай Амерыцы. Жывуць пераважна ў шыракалістых і поймавых лясах. Большасць відаў актыўныя на змярканні і ўначы, некаторыя - шкоднікі лясных і культурных раслін. На Беларусі 16 відаў, сярод іх - малая дубовая стужачніца.
Размах крылаў да 12 см. Афарбоўка пярэдніх - пад малюнак кары, заднія - яркія, з пярэвязямі (адсюль другая назва). Вусікі шчацінікападобныя. Лічынкі (вусені) маюць 3-5 пар брушных ножак, кормяцца лісцем дрэў і кустоў, пераважна букавых, вярбовых, ружавых.