Сло́нікі[1], таксама Даўганосікі[1] (Curculionidae) — найбуйнейшае сямейства жукоў, якое налічвае больш за 70 тысяч відаў, з якіх большасць засяляе трапічныя вобласці Зямлі; ў Беларусі сустракаюцца 395 відаў (напрыклад, свірнавы даўганосік (Sitophilus granarius)).
Характэрнай рысай слонікаў з’яўляецца выцягнутая пярэдняя частка галавы, так званая галаватрубка, дзякуючы якой яны і атрымалі беларускую назву.
Слонікаў падпадзяляюць на дзве часткі: караткахобатныя (Adelognatha) і даўгахобатныя (Phanerognatha), якія адрозніваюцца адзін ад аднаго даўжынёй галаватрубкі і размяшчэннем ротавых органаў. Лічынкі большасці даўгахобатных развіваюцца ўнутры тканак раслін, радзей сілкуюцца на паверхні лісця раслін або на глебе, у той час як лічынкі большай колькасці караткахобатных развіваюцца ў глебе.