Пальмі́нскі сельсавет — адміністрацыйна-тэрытарыяльная адзінка ў складзе Гарадоцкага раёна Віцебскай вобласці Беларусі. Цэнтр — аграгарадок Пальмінка.
Утвораны 20 жніўня 1924 года ў складзе Гарадоцкага раёна Віцебскай акругі БССР. Цэнтр — маёнтак Пальмінка, з 1927 года — вёска Антанопаль. Пасля скасавання акруговай сістэмы з 26 ліпеня 1930 года ў Гарадоцкім раёне БССР, з 20 лютага 1938 года — Віцебскай вобласці. 16 ліпеня 1954 года да сельсавета далучана тэрыторыя скасаванага Кабішчанскага сельсавета, цэнтр перанесены ў вёску Пальмінка[1]. 10 мая 1958 года ў склад сельсавета з Прудніцкага сельсавета перададзены 4 населеныя пункты (Баталі, Забор’е, Каменка і Хартова)[2]. У 1971 годзе скасаваны вёскі Грачыхіна і Хобня[3]. 26 сакавіка 1973 года ў склад Прудніцкага сельсавета вернута вёска Каменка[4]. На 1 студзеня 1974 года ў склад сельсавета ўваходзілі 24 населеныя пункты[5]. 12 жніўня 1974 года ў склад сельсавета з Прудніцкага сельсавета вернута вёска Каменка, скасавана вёска Галубова[6].
Насельніцтва сельсавета паводле перапісу 2009 года — 1981 чалавек[7], з іх 82,5 % — беларусы, 15,1 % — рускія, 1,3 % — украінцы[8].