У Вікіпедыі ёсць артыкулы пра іншых асоб з прозвішчам Верт.
Нікаля́ Верт (фр.: Nicolas Werth; нар. 15 верасня 1950 г., Парыж) — французскі гісторык, знакаміты даследаваннямі савецкай гісторыі часоў сталінізму.
Нікаля Верт нарадзіўся ў Парыжы ў сям’і Аляксандра Верта, брытанскага пісьменніка і журналіста расійскага паходжання. Навучаўся ў Вышэйшай педагагічнай школе. Атрымаў досвед выкладчыцкай працы ў ЗША, СССР і Кітаі, у тым ліку выкладання французскай мовы ў Мінскім дзяржаўным педагагічным інстытуце замежных моў. У 1985 — 1989 гг. працаваў аташэ па пытаннях культуры ў пасольстве Францыі ў Маскве.
З 1989 г. працуе ў Нацыянальным цэнтры навуковых даследаванняў Францыі, з’яўляецца адным з яго навуковых кіраўнікоў. У 2020 г. узначаліў французскую частку таварыства «Мемарыял».
Асноўныя даследаванні Нікаля Верта тычацца гісторыі СССР часоў сталінізму, у тым ліку рэпрэсій з ухілам на вывучэнне грамадскіх адносінаў. Крытыкуе як старую «школу таталітарызму», так і новую «школу рэвізіянізму» за скажэнні гісторыі. Лічыць, што таталітарны кантроль над грамадствам у СССР не быў поўным.