Хэлc-Гейт (англ.: Hell’s Gate) — нацыянальны парк у Кеніі, размешчаны ў 63,4 км на паўночны захад ад Найробі, 3,6 км на поўдзень ад возера Найваша.
Нацыянальны парк Хэлc-Гейт створаны ў 1984 г. для аховы асаблівага ландшафту і дзікай прыроды мясцовасці на поўдзень ад возера Найваша.
Нацыянальны парк Хэлc-Гейт уяўляе сабою два скальных узвышша вулканічнага паходжання, якія перасякае вузкі праход, які і мае назву Хэлc-Гейт (літаральна “Адская брама”). На поўдні нацыянальнага парка пачынаецца каньён ракі Ньёро́ва з гарачымі крыніцамі вады.
Для Хэлc-Гейт характэрна флора тыповай афрыканскай саванны. Фаўна прадстаўлена пераважна траваеднымі — зебрамі, жырафамі, буйваламі і інш. Драпежныя жывёлы (львы, гіены, леапарды) сустракаюцца рэдка.
Хэлc-Гейт — адзіны прыродны нацыянальны парк Кеніі, куды афіцыйна дазволены ўваход для турыстаў пешшу або на веласіпедзе.
У 1994 г. нацыянальны парк Хэлc-Гейт вывучала здымачная група мультыплікацыйнага фільма “Кароль Леў” для адлюстравання сапраўднай прыроды Афрыкі.