Міхіл Янс ван Мірэвелт, таксама Мірэвелд (нідэрл.: Michiel Jansz. van Miereveld; 1 мая 1566, Дэлфт, Галандыя — 27 чэрвеня 1641, Дэлфт, Галандыя) — нідэрландскі мастак-партрэтыст.
Міхіл Янс ван Мірэвелт вывучаў жывапіс ва Утрэхце ў 1579—1585 гадах пад кіраўніцтвам мастака Антуана ван Блокланта, пасля чаго хутка дабіўся прызнання як цудоўны майстар партрэта. Утрымліваў вялікую мастацкую майстэрню. У 1589 годзе ён ажаніўся з Крысцінай ван дэр Пас, у гэтым шлюбе меў дзвюх дачок (старэйшая, Гертруда, замужам за мастаком Якабам Вілемсам Дэлфтам), і сына Пітэра (1596—1623), які таксама стаў жывапісцам.
Ван Мірэвелт быў прыдворным мастаком прынца Аранскага і, нягледзячы на сваю блізкасць да анабаптыстаў, знаходзіўся таксама на службе ў намесніка Іспанскіх Нідэрландаў эрцгерцага Альбрэхта. Пісаў таксама карціны на гістарычныя і міфалагічныя тэмы ў маньерысцкім стылі. Меў шмат вучняў, сярод якіх быў і Хендрык Карнеліс ван Уліт.