У Вікіпедыі ёсць артыкулы пра іншых асоб з прозвішчам Зялёнкін. Міхаіл Міхайлавіч Зялёнкін (20 верасня 1920, Рудзенск, Пухавіцкі раён, Мінская вобласць — 24 чэрвеня 1991 Мінск) — Герой Савецкага Саюза, беларускі мастак.
Нарадзіўся ў сям’і чыгуначніка. Пасля заканчэння Віцебскага мастацкага вучылішча працаваў у Мiнску на фабрыцы «Кастрычнік», там жа вучыўся ў аэраклубе. З 1939 ў шэрагах Чырвонай Арміі. У 1941 годзе скончыў Батайскую ваенную авіяцыйную школу лётчыкаў. Ваяваў у складзе 156-го авіяпалка на Калінінскім, Заходнім, Волхаўскім, 1-м і 2-м Беларускіх франтах. Свае першыя паветраныя перамогі сяржант М. М. Зялёнкiн атрымаў на знішчальніку І-16. З лета 1944 ваяваў ужо на Як-3.
Да жнiўня 1944 начальнік звяна 156-га знішчальнага авіяцыйнага палка. Здзейсніў 218 баявых вылетаў, збіў асабіста 19 самалётаў і 1 аэрастат.
15 траўня 1946 за мужнасць і венную доблесць, праяўленыя ў гады Вялікай Айчыннай вайны, лётчыку было прысвоена званне Героя Савецкага Саюза. Узнагароджаны ордэнамі: Леніна, Чырвонага Сцяга, Суворава 3-й ступені, Айчыннай вайны 1-й ступені, Чырвонай Зоркі; медалямі.
У 1954 годзе скончыў Беларускі інстытут народнай гаспадаркі, жыў і працаваў у Мінску. З 1965 Член Саюза мастакоў СССР. Пахаваны на Паўночных могілках у Мінску.