Мінскі дзяржаўны абласны каледж — сярэдняя спецыяльная навучальная ўстанова ў аг. Сеніца Мінскай вобласці Беларусі. Размешчаны па адрасе вул. Набярэжная, 59.
У 1945 годзе на базе эксперыментальнай гаспадаркі Беларускай садавінагароднінай доследнай станцыі была адкрыта Мінская аднагадовая школа садаводаў і агароднікаў.
У 1972 годзе на базе школы садаводаў і агароднікаў была адкрыта Мінская абласная школа павышэння кваліфікацыі сельскагаспадарчых кадраў. А ў 1978 годзе ў в. Сеніца Мінскага раёна пастановай Савета Міністраў Беларускай ССР № 186 было прынята рашэнне арганізаваць на базе Мінскай абласной школы павышэння кваліфікацыі сельскагаспадарчых кадраў Беларускі сельскагаспадарчы тэхнікум па падрыхтоўцы кіруючых кадраў калгасаў і саўгасаў.
Падрыхтоўка спецыялістаў у тэхнікуме вялася па спецыяльнасцях «Аграномія» і «Заатэхнія». У тэхнікум прымалі толькі тых, хто меў стаж работы ў сельскай гаспадарцы не менш як два гады.
Міністэрства сельскай гаспадаркі выдзеліла значныя сродкі для аснашчэння кабінетаў і лабараторый тэхнікума, які стаў вядучай навучальнай установай па падрыхтоўцы кадраў для калгасаў і саўгасаў рэспублікі.
У 1990 годзе ў тэхнікуме першым сярод ССНУ была адкрыта спецыяльнасць «Камерцыйная дзейнасць», інтэграваная з вышэйшай адукацыяй. Навучэнцы тэхнікума атрымалі магчымасць прадоўжыць навучанне ў Беларускай сельскагаспадарчай акадэміі па скарочанай форме. Гэта стала штуршком да змянення статусу навучальнай установы і яе перайменавання. 17 сакавіка 1993 г. загадам Міністэрства сельскай гаспадаркі і харчавання Рэспублікі Беларусь і Міністэрства адукацыі Рэспублікі Беларусь Беларускі сельскагаспадарчы тэхнікум па падрыхтоўцы кіруючых кадраў калгасаў і саўгасаў атрымаў статус каледжа і быў перайменаваны ў Мінскі дзяржаўны аграрна-камерцыйны каледж.
У 1993 годзе адкрылася спецыяльнасць «Вытворчасць, захоўванне і перапрацоўка прадукцыі раслінаводства», а з 1996 года ў каледжы пачата падрыхтоўка па спецыяльнасці «Маркетынг».
У 2001 годзе ў сувязі з неабходнасцю стварэння вучэбнай базы па падрыхтоўцы спецыялістаў з сярэдняй спецыяльнай адукацыяй для канцэрна «Белдзяржхарчпрам» пастановай № 1147 Савета Міністраў Рэспублікі Беларусь ад 6 жніўня 2001 года каледж быў уключаны ў склад Беларускага дзяржаўнага канцэрна харчовай прамысловасці «Белдзяржхарчпрам».
У 2002 годзе па прапанове канцэрна ў каледжы пачынаецца падрыхтоўка спецыялістаў для маслатлушчавай галіны рэспублікі па спецыяльнасці «Тэхналогія перапрацоўкі расліннай і жывёльнай сыравіны».
У чэрвені 2006 года ў адпаведнасці з загадам канцэрна «Белдзяржхарчпрам» і рашэннем Мінскага раённага выканаўчага камітэта ўстанова адукацыі «Мінскі дзяржаўны аграрна-камерцыйны каледж» была перайменавана ва ўстанову адукацыі «Мінскі дзяржаўны каледж харчовай прамысловасці».
Канцэрн «Белдзяржхарчпрам» выдзеліў значныя сродкі для развіцця матэрыяльна-тэхнічнай базы каледжа. Акрамя таго, многія арганізацыі канцэрна «Белдзяржхарчпрам», такія як ААТ «Мінскі маргарынавы завод», ААТ «Крыніца», СААТ «Камунарка» і інш., выкарыстоўваюцца ў якасці баз для арганізацыі практычнага навучання навучэнцаў.
У 2007 годзе ў каледжы ўпершыню ў рэспубліцы распачата падрыхтоўка па спецыяльнасці «Садова-паркавае будаўніцтва». Каледж стаў першай у рэспубліцы навучальнай установай, якая рыхтуе тэхнікаў па азеляненні з сярэдняй спецыяльнай адукацыяй.
У 2008 годзе ў каледжы адкрыта завочная форма навучання па спецыяльнасці «Тэхналогія перапрацоўкі расліннай і жывёльнай сыравіны», а ў 2010 годзе па спецыяльнасці «Маркетынг».
У жніўні 2013 года каледж перададзены ў падпарадкаванне Упраўлення адукацыі Мінаблвыканкама.
11 снежня 2014 года рашэннем Упраўлення адукацыі Мінаблвыканкама «Мінскі дзяржаўны каледж харчовай прамысловасці» перайменаваны ў «Мінскі дзяржаўны абласны каледж»
Рыхтуе спецыялістаў па спецыяльнасцях: маркетынг; візуальны мэрчэндайзінг; Тэхналогія тлушчаў, эфірных алеяў і парфумерна-касметычнай прадукцыі; вытворчасць, захоўванне і перапрацоўка прадукцыі раслінаводства.