У Вікіпедыі ёсць артыкулы пра іншых асоб з прозвішчам Ладуцька. Мікалай Аляксандравіч Ладуцька (нар. 21 сакавіка 1959, Мінск) — старшыня Мінскага гарадскога выканаўчага камітэта з 25 чэрвеня 2010 года па 6 лістапада 2014 года.
У 1981 скончыў Беларускі політэхнічны інстытут (сучасны БНТУ), у 2007 — Акадэмію кіравання.
Працаваў у будаўніцтве і ў камсамольскім руху. З 2003 года — дырэктар Кіравання капітальнага будаўніцтва Мінгарвыканкама; удзельнічаў у будаўніцтве Нацыянальнай бібліятэкі Беларусі.
З 2006 года — кіраўнік адміністрацыі Фрунзенскага раёна. 24 верасня 2007 года прызначаны намеснікам старшыні Мінгарвыканкама.
10 чэрвеня 2009 года ў сувязі з хваробай Міхаіла Паўлава прызначаны выканаўцам абавязкаў старшыні Мінгарвыканкама, а 25 чэрвеня 2010 года — старшынёй[1]. 6 лістапада 2014 года быў зняты з пасады[2].
З 8 чэрвеня 2015 Мікалай Ладуцька ўзначаліў прадпрыемства «Мотавела»[3]. 15 чэрвеня 2018 г. быў абраны старшынёй аб’яднання «Мінскі сталічны саюз прадпрымальнікаў і працадаўцаў»[4].