Марцін (Марцыян) Міхал Крышпін-Кіршэнштэйн (? — 20 жніўня 1700) — дзяржаўны дзеяч Вялікага Княства Літоўскага.
Вучыўся ў Падуанскім універсітэце. Служыў у вялікалітоўскім войску, палкоўнік (1667). Вялікі літоўскі падстолі (1687-1689) і падчашы (1689—1697), кашталян троцкі з 1697; цівун віленскі з 1673, староста плунгянскі, аршанскі ў 1676—1699; пасол на соймы 1667, 1692, 1696.
Належаў да каралеўскай партыі, выступаў супраць групоўкі Сапегаў.
Сын вялікага літоўскага падскарбія Гераніма Крышпіна-Кіршэнштэйна і Ганны Млоцкай, дачкі аршанскага старосты Андрэя Млоцкага. Быў жанаты з Янай Валадковіч, дачкой новагародскага ваяводы Крыштафа Валадковіча.
Пакінуў дзяцей Казіміра Францішка, Ежы Гераніма, дачку Кацярыну Аляксандру, якая выйшла за падканюшага літоўскага Яна Казіміра Бяганскага.