Запыт «Мунстэр» перанакіроўваецца сюды; гл. таксама іншыя значэнні. Манстэр (англ.: Munster, ірл.: An Mhumhain [ənˈvuːnʲ]) — гістарычная правінцыя на поўдні Ірландыі, на тэрыторыі Рэспублікі Ірландыі. Уключае графствы Керы, Клэр, Корк, Лімерык, Тыперэры і Уотэрфорд. Найбуйнейшы горад — Корк. Насельніцтва 1,1 млн чалавек (2002). Плошча тэрыторыі складае 24 607 км².
Назва Манстэр паходзіць ад імя кельцкай багіні Мума. У раннім Сярэднявеччы правінцыя падзялялася на шэсць рэгіёнаў — Паўднёвы Манстэр, Заходні Манстэр, Паўночны Манстэр, Усходні Манстэр, Эрнайскі Манстэр і Дэйзійскі Манстэр. Затым з гэтых абласцей утварыліся тры каралеўствы — Томанд, Дэсманд і Орманд. Цяперашнія герб і сцяг правінцыі, якія нясуць выяву трох залатых карон на сінім фоне, адлюстроўваюць менавіта гэты перыяд гісторыі.