Малгажата з Зембаціна (польск.: Małgorzata z Zembocina) — аперэта Яна Чачота, упершыню прачытаная 18 снежня 1819 года на пасяджэнні філаматаў.
Ян Чачот расказвае пра эпізод вяртання з вайны рыцара Мікалая якраз у той момант, калі яго адданая жонка Малгажата можа стаць ахвяраю інтрыгаў спакусніка Шчэпана і яе служанкі Эвы. Адам Міцкевіч лічыў гэта лібрэта творчай удачай сябра. У сваёй рэцэнзіі на твор, напісанай 29 снежня 1819 года ён даваў высокую ацэнку музычнасці верша ў пачатковых арыях[1], але адзначыў, што цяжка зразумець да якога тыпу оперы належыць твор[2].